Welcome to Farg'ona Viloyati Statistika Boshqarmasi   Click to listen highlighted text! Welcome to Farg'ona Viloyati Statistika Boshqarmasi Powered By GSpeech
  2. Asosiy sahifa
  3. AXBOROT XIZMATI
  4. Viloyat yangiliklari

So‘x tumanida viloyat sektor rahbarlarining ommaviy sayyor qabuli o‘tkazildi

Farg‘ona viloyatining anklav hududi hisoblangan, 76 mingdan ortiq aholi istiqomat qiladigan So‘x tumanida 2019 yil 23 iyul kuni viloyat sektor rahbarlari, ya’ni 1-sektor rahbari, viloyat hokimi Sh.M.G‘aniyev, 
2-sektor rahbari, viloyat prokurori S.Turdiyev, 3-sektor rahbari, viloyat Ichki ishlar boshqarmasi boshlig‘i R.Mamatov, 4-sektor rahbari, viloyat Soliq boshqarmasi boshlig‘i Yu.Nasimdjanovlar tomonidan ommaviy sayyor qabul o‘tkazildi.
Qabul hududlarda axolini qiynab kelayotgan va ko‘plab e’tirozlarga sabab bo‘layotgan dolzarb muammolarni aniqlash va ularni bartaraf etish yuzasidan aniq choralar ko‘rish, fuqarolarning davlat idoralariga bo‘lgan ishonchini yanada mustahkamlash maqsadida tashkil etildi.
Qabul jarayonida barcha viloyat boshqarma va tashkilotlar rahbarlari, prokuratura, IIB va sud organlari hamda tuman sektor rahbarlari ishtirok etdilar.
Qabulda jami 254 nafar fuqarolar qatnashib, ulardan bevosita sektor rahbarlariga 162 ta murojaat kelib tushdi. Jismoniy va yuridik shaxslar vakillarining 28 ta ichimlik suvi va sug‘orish tizimida suv ta’minoti, 16 ta ichki yo‘llarni ta’mirlash, 20 ta qurilish ishlarini olib borish, 10 ta mahalla fuqarolar yig‘ini faoliyati va ularning moddiy-texnika bazasi masalasida, 8 ta uy-joy masalasida, 4 ta moddiy yordam ko‘rsatish va boshqa masalalarda murojaatlari ko‘rib chiqildi.
O‘tkazilgan qabul natijalari bo‘yicha 25 nafar murojaatchilarning masalasi joyida ijobiy hal etildi, 19 nafar murojaatchilarga tushuntirish berildi.
Qabul davomida kelib tushgan murojaatlardan kelib chiqqan holda So‘x tumani axolisini ijtimoiy-ma’naviy qo‘llab-quvvatlash, ularga qulay sharoitlarni yaratish maqsadida mavjud holatni to‘liq o‘rganib chiqish bo‘yicha viloyat hokimligi, boshqarma va tashkilotlar vakillaridan iborat ishchi guruh tashkil etildi. 
Aholi bilan suhbat davomida ular o‘zlarini qiynab turgan muammolarni bayon etdilar. Jumladan, Hushyor qishlog‘idan kutubxonachi bo‘lib ishlagan, hozirda pensiyadagi Ikromova Zulfiyaxon opa “Obod qishloq” dasturi bo‘yicha amalga oshirilayotgan ishlardan minnatdor ekanligini bildirar ekan, qishloqdagi talabga javob bermay qolgan eski madaniyat uyi binosini buzib, binoni yangidan qurib, bu yerda madaniyat maskani barpo etishni, kutubxona ham ochishni taklif qildi. Masala mas’ul rahbarlar e’tiboriga havola qilindi, topshiriq berildi. Bu kabi ko‘plab murojaatlar sayyor qabul davomida bildirildi.
So‘x tumani Sarikanda qishlog‘i Gulirayhon ko‘chasida yashovchi Mamasharipov O‘lmasjonning “Nogiron qizi uchun nogironlik aravachasi va moddiy yordam berish masalasida”, So‘h tumani G‘aznov qishlog‘ida yashovchi Mirzoyeva Fayzinisoning “Fuqarolik pasportini olish masalasida”gi va boshqa qator murojaatlar ijobiy hal etildi. 
Rovon qishlog‘ida yashovchi Ergashev Metinning "Sog‘liqni saqlash sohasida mutaxassislar yetishmasligi sabab viloyat markazidan yetishmaydigan sohalar bo‘yicha mutaxassislar yuborish to‘g‘risida”gi murojaati ijobiy hal etilib, tibbiyot yo‘nalishidagi oliy ta’lim muassasalariga imtiyozli qabul qilish uchun viloyat hokimligiga ajratilgan 14 ta kvotadan 10 tasi so‘xlik yoshlar uchun ajratib berildi. 
Yangiariq qishlog‘ida yashovchi Ibragimov Tolibjonnning tumanda kurash maktabini ochish bo‘yicha taklifi yuzasidan viloyat hokimligi tomonidan 400 mln so‘m mablag‘ ajratish rejalashtirildi.
Shuningdek, tumanga kuz-qish mavsumi uchun 5000 tonna ko‘mir olib kelinishi, qishga tayyorgarlik ishlari uchun 3 mlrd so‘m pul mablag‘i ajratilgani bildirildi.
Qabul davomida 12 nafar malakali tibbiyot xodimlari tashrif buyurib, ular bir hafta davomida tumanda istiqomat qiluvchi aholini, ayniqsa, ayollar, yoshlar, keksalarni chuqurlashtirilgan tibbiy ko‘rikdan o‘tkazmoqdalar.
Shuningdek, Davlat xizmatlari agentligi Farg‘ona viloyati boshqarmasi tomonidan tuman aholisi uchun sayyor davlat xizmatlari tashkil etildi.
So‘x tumanida o‘tkazilgan qabul davomida ko‘plab so‘xliklar ularga berilayotgan e’tibor, g‘amxo‘rlik va imkoniyatlardan juda ko‘plab minnatdorchiliklarini bildirib o‘tdilar. Jumladan, 85 yoshli otaxon, mehnat fahriysi Subhiddin Sharofiddin, “Fidokorona mehnatlari uchun” ordeni sohibi Shahodat Boybolayeva va boshqalar xalq g‘amini o‘ylayotgan viloyat rahbarlari, avvalo barcha ijobiy o‘zgarishlar boshida turgan mamlakatimiz Prezidentiga So‘x aholisi nomidan minnatdorchilik bildirdilar.
 
Axborot xizmati

Farg‘onada Xitoyning yirik qurilish kompaniyasi ish boshlaydi

Mamlakatimizda O‘zbekiston Respublikasi Prezidentining qarorlari asosida urbanizatsiya jarayonlarini amalga oshirish harakatlari boshlanib ketdi. Jumladan, Farg‘ona viloyatida ham tuman markazlarida ham shahardagi kabi shart-sharoitlarni yaratish, har tomonlama rivojlangan turmush darajasiga erishishi uchun chora-tadbirlar belgilab olindi. Bugungi kunda ushbu ishlarni amalga oshirishda nafaqat o‘z ijtimoiy-iqtisodiy imkoniyatlarimizni ishga solish, balki chet ellik mutaxassislarni ham jalb qilishga kirishilgan.
Bugun Farg‘ona viloyati hokimi, Oliy Majlis senati a’zosi Shuhrat G‘aniyev hokimlik qabullar uyida Szyan Aymin boshchiligidagi Xitoy Xalq Respublikasining CCECC (Xitoy fuqarolik muhandislik-qurilish korporatsiyasi) korporatsiyasi vakillarini qabul qildi. 
Ushbu korporatsiya dunyoda uchinchi eng yirik qurilish kompaniyasi hisoblanadi. Korporatsiya aeroportlar, temir yo‘llar va boshqa inshootlar qurish bilan shug‘ullanadi. Uning vakillari O‘zbekistonga, xususan, Farg‘onaga 14 ta tuman markazida kanalizatsiya tizimini qurish loyihasi ustida ishlash maqsadida tashrif buyurganlar.
Viloyat hokimi Sh.G‘aniyev o‘z so‘zida “Bir makon, bir yo‘l” forumining mamlakatlarimiz o‘rtasidagi hamkorlik aloqalarini mustahkamlashda, O‘zbekistonning rivojlangan mamlakatlar qatoriga chiqishida ahamiyatli ekanini ta’kidladi. Shuningdek, viloyatimiz aholisining 90 % i ichimlik suvi bilan ta’minlanganligini, kanalizatsiya tizimi bilan esa 47% ta’minlanganligini, aholida bunga ehtiyoj katta ekanligini aytib o‘tdi. Shu bilan birga, SSESS kompaniyasi haqida shu forumdagi ishtiroki paytida ma’lumotga ega bo‘lganligi va ushbu kompaniya bilan hamkorlik qilish istagi paydo bo‘lganini aytdi.
Janob Szyan esa Farg‘ona viloyatining istiqboli yaxshi ekanini, xalqimiz mehnatkashligi, bular davlat taraqqiyotining asosi ekanligiga urg‘u berdi va kompaniya Farg‘ona viloyati bilan hamkorlik qilishga tayyor ekanini, mutaxassislar guruhi allaqachon tashkillanganini, bugun esa moliyalashtirish va investitsiya kiritish bo‘yicha mutaxassislar kelganlarini bildirdi. 
Rasmiy uchrashuv jarayonida hamkorlar ro‘yxati, kommunikatsiya masalalalari, loyihani amalga oshirish va hamkorlik shartlari haqida muzokara olib borildi, Xitoy taraqqiyot banki bilan hamkorlik masalalari ham ko‘rib chiqildi.
Viloyat hokimi albatta ushbu loyiha ikki tomonlama manfaatli asosda, O‘zbekiston va Xitoy qonunchiligiga muvofiq tarzda amalga oshirilishini ta’kidladi.
Szyan Aymin OAV uchun bergan intervyusida quyidagilarni so‘zladi:
- O‘zbekistonga birinchi kelishim. Xalqingiz mehnatkash va yaxshi yashashga intiluvchan ekanligi katta taassurot qoldirdi. Bizning SSESS kompaniyamiz Xitoyning eng yirik kompaniyasidir, biz mahalliy iqtisodiyotingiz rivojiga o‘z texnologiyamiz va investitsiyamiz bilan hissa qo‘shishga tayyormiz. Bugun kanalizatsiya tizimini modernizatsiyalash loyihasi dolzarb loyihalardan hisoblanadi, chunki hayot farovonligi, turmush darajasi ushbu tizimga ham bog‘liq, shuning uchun bu juda muhimdir. Biz O‘zbekiston va Xitoy hukumati rahbarligi va qo‘llab-quvvatlashi ostida sizning iqtisodingiz va hayot darajangizning rivojlanishi uchun o‘z kuchimizni sarflashga tayyormiz. Xalqlarimiz qadimdan do‘stlik aloqalarida bo‘lib kelgan. Bugungi kunda O‘zbekiston Prezidenti ham qo‘llab-quvvatlayotgan “Bir makon, bir yo‘l” g‘oyasi ushbu tarixiy, qdimiy aloqalarimiznnig mustahkamlanishiga xizmat qiladi. 
Kunning ikkinchi yarmida delegatsiya a’zolari loyiha amalga oshiriladigan ob’ektlarni ko‘rishga bordilar. Hozircha Quvasoy, Beshariq va Buvayda tumanlarida xitoylik hamkorlarimiz loyiha ustida ish olib boradigan bo‘ldilar.

 

Manba: FARG‘ONA VILOYATI HOKIMLIGI
RASMIY VEB SAYTI

Margʻilonda “Buyuk ipak yoʻli” xalqaro folklor musiqa festivali boshlandi

Shu kunlarda Margʻilon shahri dilbar navolar, mumtoz qoʻshiqlar, jozibador raqslar anjumani – “Buyuk ipak yoʻli” xalqaro folklor musiqa festivaliga mezbonlik qilmoqda.
 
Bugun Margʻilon shahridagi Erkin Vohidov nomidagi ijodkorlar bogʻida xalq ogʻzaki ijodi namunalarini tarannum etuvchi folklor bayramining ochilish marosimi boʻlib oʻtdi.
 
Festivalda Italiya, Germaniya, Fransiya, Kanada, Janubiy Koreya, Malayziya, Rossiya, Hindiston, Turkiya, Tojikiston, Qozogʻiston, Turkmaniston, Qirgʻiziston, Yaponiya, Eron, Polsha, Moʻgʻuliston, Daniya kabi 20 ga yaqin davlat hamda yurtimizning barcha hududlaridan kelgan sanʼat ustalari, folklor jamoalari, badiiy ansambllar ishtirok etmoqda.
 
Birinchi marotaba oʻtkazilayotgan festival 3 kun davomida mamlakatimizda nomoddiy madaniy merosni asrab-avaylash, xususan, folklor sanʼatini rivojlantirish va keng targʻib qilishga munosib hissa qoʻshishi, shubhasiz.
 
Davlatimiz rahbari taʼkidlaganidek, insoniyat yaratgan bebaho madaniyat durdonalari, eng avvalo, har qaysi millatning folklor sanʼatida mujassam topgani hammamizga yaxshi maʼlum. Turli xalqlarning milliy oʻzligini, ularning tili va hayot tarzini, anʼana va urf-odatlarini ifoda etadigan baxshichilik sanʼati umumbashariy madaniyatning uzviy qismi sifatida barchamiz uchun qadrlidir.
 
Bugungi kunda Fargʻona viloyatida 5 ta – Margʻilon shahrida “Chodir jamol”, Qoʻqon shahrida “Qoʻqon yor-yori”, Qoʻshtepa tumanida “Kabutar”, Soʻx tumanida “Soʻx chashmasi”, Furqat tumanida “Shodlik” va Quvasoy shahrida “Qoʻsh chinor” folklor-etnografik ansambllari, shuning¬dek, 41 ta havaskor folklor guruhi faoliyat koʻrsatmoqda. Har bir guruhning bir-biriga oʻxshamagan, oʻziga xos repertuari mavjud. Ularning musiqiy ijrochiligida yalla, lapar, aytishuv, oʻlan, yor-yor, allalar alohida oʻringa ega.
 
– Qaysi tilda jaranglamasin, folklor baribir folklorda. Beixtiyor raqsga chorlaydi, qoʻshiqqa joʻr boʻlging keladi, – deydi “Soʻx chashmasi” folklor etnografik ansambli badiiy rahbari Abduvaqqos Yusupov. – Ansamblimiz oʻzining shiru shakar qoʻshiqlari, yaʼni oʻzbekcha-tojikcha laparlari, ashulalari bilan tadbirga fayz bagʻishlash uchun keldi. Bunday nufuzli anjumanda birinchi bor qatnashishimiz emas. 2018-yilda “Boysun bahori” folklor bayramida sovrindor boʻlgan edik. Bu kabi tantanalar ijodiy jamoalar uchun oʻziga xos qoʻllab-quvvatlashdir.
 
Maʼlumki, xalq ogʻzaki ijodi namunalarini keng targʻib etish va ommalashtirishda xalq dastalarining oʻrni va hissasi katta ekanligini alohida taʼkidlab oʻtish joiz. Aynan shu kabi isteʼdodlarimizning izlanish va intilishlari tufayli ushbu sanʼat turi butun dunyoda shuhrat topib, qadri abad qadriyat sifatida avloddan avlodga oʻtib kelmoqda.
 
Ayni jarayonda keyingi yillarda yurtimizda xalqimiz maʼnaviy merosini oʻrganish, ezgu anʼana va qadriyatlarimizni asrab-avaylash, yosh avlod maʼnaviyatini yuksaltirishda boqiy merosimiz boʻlgan folklor jamoalaridan keng foydalanish, xalqimizning nomoddiy madaniy merosi boʻlgan folklor asarlarini toʻplash va keng targʻib etishga katta eʼtibor qaratilmoqda. Zotan, oʻzining mazmuni, tarbiyaviy ahamiyati va umrboqiyligi bilan ajralib turuvchi folklor sanʼati xalqimizning turmush tarzi, dunyoqarashi, ruhiy estetik olami, ichki kechinmalari, orzu-maqsadlarini sodda va yuksak badiiy ifoda eta olgan azaliy qadriyatdir.
 
Shu maʼnoda, bugun Margʻilon shahrida tantanali ravishda ochilgan xalqaro festival xalqimizga xos samimiy mehmondoʻstlik anʼanalarini keng targʻib etib, unda ishtirok etayotgan har bir ishtirokchi qalbida bir umr unutilmas taassurotlar qoldiradi. Eng asosiysi, festivalning umuminsoniy ezgu gʻoyalari butun dunyoda aks-sado berib, u tinchlik va doʻstlik, asl sanʼatni targʻib etuvchi tantana sifatida nishonlanadi.
 
Margʻilonda bu kabi nufuzli anjuman ilk marotaba oʻtkazilayotgani yoʻq. Koʻhna va navqiron shahar keyingi yillarda muntazam ravishda oʻtkazib kelinayotgan xalqaro “Atlas bayrami”ga ham mezbonlik qilib kelmoqda. Bu festival milliy hunarmandchiligimizni keng targʻib etuvchi oʻziga xos mahorat maydoniga aylangan boʻlsa, har ikki yilda bir marotaba oʻtkazilishi rejalashtirilayotgan mazkur folklor festivali esa sanʼatga oshufta dillarni birlashtirishga katta hissa qoʻshadi.
 
 
O'zA

Farg’ona viloyati hokimligiga 2019 yil 6 oyi davomida kelib tushgan jismoniy va yuridik shaxslarning murojaatlarini ko’rib chiqish natijalari to’g’risida

Farg’ona viloyati hokimligi tomonidan jismoniy va yuridik shaxslar vakillaridan kelib tushgan murojaatlarni o’z vaqtida ko’rib chiqish hamda ularda ko’tarilayotgan masalalarni belgilangan tartibda qonuniy hal etish choralari ko’rilmoqda.

2019 yil 6 oyi davomida barcha manbaalar orqali jami 13538 ta murojaatlar kelib tushdi.

Shundan, O’zbekiston Respublikasi Prezidentining Virtual qabulxonasi va Xalq qabulxonalari elektron tizimi orqali 10111 ta, viloyat hokimligiga to’g’ridan-to’g’ri 1917 ta yozma murojaat, 1510 ta og’zaki murojaatlardir.

Murojaatlarning mazmun-mohiyatiga ko’ra, murojaatlar ko’proq boshlang’ich to’lovsiz uy-joy bilan ta’minlash, uy-joy qurish va tadbirkorlik bilan shug’ullanish uchun er maydonlari ajratish hamda moddiy yordam ko’rsatish masalalarida tushmoqda.

Eng ko’p murojaatlar tushishi Farg’ona (2236 ta), Qo’qon (1251 ta), Marg’ilon (1190 ta) shaharlari, Oltiariq (956 ta), Quva (808 ta),Rishton 
(767 ta), Farg’ona (734 ta), Dang’ara (675), Uchko’prik (632 ta) va O’zbekiston 
(547 ta) tumanlari hisobiga to’g’ri kelmoqda.

Jismoniy va yuridik shaxslarning murojaatlari bilan ishlash masalalariga alohida e’tibor qaratilib, aholini qiynab turgan muammolari bilan yanada jiddiyroq shug’ullanish lozimligini inobatga olgan holda viloyat hokimining 10 marta ommaviy sayyor qabullari o’tkazildi.

Eng ko’p murojaatlar tushayotgan hududlarda yashovchi jismoniy va yuridik shaxslar vakillari bilan to’g’ridan-to’g’ri muloqotni yanada kengaytirish, muammolarni joyida bartaraf etish maqsadida viloyat hokimi va hokim o’rinbosarlarining sayyor qabullar jadvali tasdiqlanib, ular tomonidan o’tkazilgan sayyor qabullarda 1510 nafar aholi vakillarining murojaatlari qabul qilindi.

Hisobot davrida viloyat boshqarmalari va korxona tashkilotlari hamda shahar, tuman hokimliklarining murojaatlar bilan ishlovchi xodimlarining murojaatlar bilan ishlash borasidagi bilim va ko’nikmalarini oshirish maqsadida viloyat hokimligi apparati hodimlari uchun, viloyat “Mahalla” jamoat fondi binosida mahalla faollari uchun, Farg’ona shahar yuridik kollejida shahar, tuman hokimliklarining murojaatlar bilan ishlovchi va ijro intizomiga mas’ul xodimlari uchun, Farg’ona shahar hokimligi bazasida boshqarmalar va hokimliklar rahbarlarining birinchi o’rinbosarlari va huquqshunoslari hamda boshqa mas’ul xodimlari uchun o’quv-seminarlari o’tkazildi.

Shuningdek, viloyat hokimligining 2019 yil 28 martdagi yig’ilish bayonida berilgan topshiriqlar ijrosi yuzasidan ish yuritish, jismoniy va yuridik shaxslarning murojaatlari bilan ishlash, topshiriqlar bajarilishida nazoratni tizimli yo’lga qo’yish bo’yicha seminarlar tashkil etish reja-jadvaliga asosan barcha shahar, tuman hokimliklarida amaliy seminarlar o’tkazildi.

Viloyatda murojaatlar bilan ishlashning ahvoli 46 ta shahar, tuman hokimliklari va boshqarmalarda o’rganilib, natijalari kengaytirilgan yig’ilishlarda muhokama etildi.

Viloyat hokimligiga barcha manbaalar orqali kelib tushgan murojaatlar 
8 marta tahlil etilib, viloyat boshqarmalari rahbarlari hamda barcha shahar, tuman hokimliklariga yo’l qo’yilgan kamchiliklar va ularni bartaraf etish choralarini ko’rish yuzasidan nazoratli topshiriq xatlari yuborildi.

Tahlil va o’rganishlar yakunlariga ko’ra murojaatlarni ko’rib chiqishda kamchilik va qonunbuzilish holatlariga yo’l qo’yganligi uchun 47 nafar turli darajadagi mas’ullarning intizomiy javobgarligi ko’rib chiqildi.

Olib borilgan ishlar natijasida O’zbekiston Respublikasi Prezidenti Virtual qabulxonasi orqali kelib tushgan murojaatlarning 55,2 foizi, viloyat hokimligiga kelib tushgan murojaatlarning 48,4 foizi, shahar, tuman hokimliklariga bevosita kelib tushgan murojaatlarning 47,2 foizining ijobiy hal etilishi ta’minlandi va viloyat hokimligiga kelib tushayotgan murojaatlarning 6535 tagakamayishiga erishildi.

Viloyat hokimligi kelgusida ham murojaatlar bilan ishlash samaradorligini oshirish va ularni o’rganish natijalari bo’yicha ochiqlik va shaffoflikni ta’minlash choralarini ko’rib boradi.

 

Manba: FARG‘ONA VILOYATI HOKIMLIGI
RASMIY VEB SAYTI

FARG‘ONADA “HOKIM VA YoShLAR” UChRAShUVI BO‘LIB O‘TDI

Farg‘ona shahridagi Tadbirkorlar markazi zalida “30 iyun – Yoshlar kuni” munosabati bilan viloyat hokimi Shuhrat G‘aniyevning viloyat yoshlari bilan “Hokim va yoshlar” uchrashuvi bo‘lib o‘tdi.
Uchrashuvda viloyat boshqarma, tashkilotlarining rahbarlari, OAV vakillari, viloyatimizning 19 ta shahar-tumanlaridan yoshlar vakillari ishtirok etdilar. Ular orasida bu yil maktabni oltin va kumush medallar bilan tamomlagan yigit-qizlar, jahon chempionatlarida qatnashgan sportchilar, olimpiada g‘oliblari va maktab, kollej, oliy o‘quv yurtlarida ta’lim oluvchi boshqa faol yoshlar ham bor. 
Uchrashuvning avvalida viloyat hokimi nutq so‘zlab, bugun yoshlar bilimli, tafakkurli, har sohada yetuk va albatta baxtli bo‘lishlari uchun olib borilayotgan ishlar haqida so‘zladi. Xususan, Prezidentimiz tomonidan ilgari surilgan 5 muhim tashabbus doirasida bajarilayotgan va bajarilishi kerak bo‘lgan vazifalarga alohida to‘xtalib o‘tdi. 
Yurtboshimizning: “Bilim, madaniyat, fidoyilik birinchi o‘rinda bo‘lishi kerak. Ma’naviyat iqtisodiyotga ham asos bo‘ladi. Farzandlarimizni sog‘lom, bilimli, vatanparvar qilib tarbiyalash uchun hech narsani ayamaymiz. Ana shunday yoshlar bizning ertangi kunimiz” degan so‘zlariga alohida urg‘u berildi. 
Hokim o‘z nutqidan keyin yoshlarga savollar bilan murojaat qilib, iqtisodiyot, tarix, adabiyot va boshqa sohalarda savollar berdi. Eng bilimdon, topag‘on yigit-qizlar viloyat hokimi tomonidan 25 ta kompyuter, ayped va boshqa esdalik sovg‘alari bilan rag‘batlantirildi.
Viloyat hokimi uchrashuv davomida yoshlarning takliflarini tingladi, ularning savollariga javob berdi. Yoshlar vakillaridan tushgan savollarga javob berish mobaynida rahbarning tashabbuskor, bilim olishdan to‘xtamaydigan, adolatli, to‘g‘riso‘z, mehnatdan qochmaydigan, mas’uliyatni zimmasiga ola biladigan bo‘lishi kerakligini ta’kidlab o‘tdi. 
- Shuhrat Madaminovichning Farg‘ona yoshlariga bo‘lgan mehrini ko‘rib, o‘zimizni boshqacha his qildik. Ilgarigi “Hokim va yoshlar” uchrashuvlarida ko‘proq ijtimoiy muammolar bo‘yicha suhbatlashilgan bo‘lsa, bu safar uchrashuv bayramona tarzda o‘tyapti. Hokimimizning har bitta bolani diqqat bilan eshitib, ularning fikrlariga baho berib, otalarcha bergan maslahatlari albatta kelajakda dasturilamal bo‘lib xizmat qiladi. Har bir yosh 5 tashabbus bo‘yicha fikrlar, takliflarini bildirdilar. Viloyatimiz hokimining Farg‘ona yoshlarini boshqa viloyatlar yoshlariga o‘rnak qilib ko‘rsatamiz deganlari barchamizni judayam ruhlantirdi – deya uchrashuv haqida o‘z fikrlarini bildirdi Uchko‘prik tumani Yoshlar Ittifoqi kengashi sardori Asilbek Homidov.
- Men esa bu uchrashuvda birdaniga ikkita ayped va kompyuter yutib oldim, - deydi Farg‘ona politexnika instituti talabasi Muxlisa Mirzarahimova. – Bu safarga uchrashuvning juda rasmiy bo‘lmaganligi, iste’dodli yoshlarimizning rag‘batlantirilishi, shunday savol-javob tariqasida bilimni baholab sovg‘alar berilishi yoshlarni bilimli bo‘lishga otlantirdi. 
Tadbirda yutuqlarga erishgan yoshlar vakillari alohida mukofotlar bilan taqdirlandilar. Jumladan, Vazirlar Mahkamasining 2017 yil, 14 noyabrdagi 914-sonli qarori hamda Respublika komissiyasining 2019 yil, 24 maydagi 6-sonli qarori bilan Mo‘ydinov Davronbekka oliy o‘quv yurtiga kirish uchun tavsiyanoma hamda mukofot berildi. Miraziz Mirzaxalilov esa o‘smirlar o‘rtasida boks bo‘yicha Osiyo chempioni bo‘lgani uchun taqdirlandi. Shuning7dek, Asadbek Odilov fan olimpiadasida ingliz tili bo‘yicha 1-o‘rin sohibi bo‘lgani, Yo‘lchiyev Alisher tadbirkorlik faoliyatida 16 nafar yoshlarni ish bilan ta’minlagani uchun taqdirlandilar.
Shuningdek, 5 tashabbus doirasida har bir tashabbus uchun bir milliarddan, jami 5 milliard pul ajratilib, yoshlar o‘rtasida o‘z iqtidorlarini namoyon qilishlari va mukofotlar egasi bo‘lishlari uchun konkurs e’lon qilinishi katta quvonch bilan kutib olindi. 
Ikki soatdan ortiq davom etgan “Hokim va yoshlar” uchrashuvi juda samimiy, qiziqarli o‘tdi. 

 

Manba: FARG‘ONA VILOYATI HOKIMLIGI
RASMIY VEB SAYTI

Tugmani bosing Tinglash